As aventuras de Basilius Hoffman terán a súa continuidade no 2014

Fernando M. Cimadevila, autor de «O mundo secreto de Basilius Hoffman», da a coñecer a data de saída e mais o título da terceira entrega da saga nunha entrevista no Blog «Fervenzas Literarias»

Almuric

O mes pasado prometiamos máis Robert E. Howard; e aquí temos Almuric, unha novela a medio camiño entre a Fantasía Épica e a Space Opera que se atopa entre o mellor da narrativa do creador de Conan.

Problemas co servidor de compra en liña

Parece ser que estamos a ter problemas co servidor de compra en liña. Unha vez detectado imos a intentar subsanalo canto antes. Mentres tanto, se queredes facer unha compra podedes pórvos en contacto con nós a través do correo electrónico info@urcoeditora.com.
Un saúdo e desculpade as molestias.

Contos de Ciencia Ficción de Jack London

Velaquí a nosa última novidade; Contos de Ciencia Ficción volume 1, unha escolma de relatos de Jack London peneirados de entre o mellor da súa obra.

E proximamente, máis London e Robert E. Howard.

I Premio Urco de relato fantástico

Comprácenos presentar a primeira edición do que, agardamos, será un premio literario de longo percorrido

Bases:

1.E isto que vén sendo?
Urco, a editora pioneira na edición de literatura fantástica en lingua galega convoca o: I Premio Urco de Relato Fantástico

2.E logo por que?
A mellora da capacidade lectora e o fomento da creación literaria entre a mocidade, así como dar a coñecer a literatura de xénero fantástico.

3.A quen vai dirixido / quen pode participar / que teño que facer?
Poderá participar calquera alumno de secundaria dos centros públicos da Galiza, presentando como máximo un relato por cada categoría.

4.Como participo?
Fase 1: inspiración
Todos os grandes escritores en potencia teñen que se inspirar nos mestres da súa época e do pasado, daquela deberás ler, cando menos, un dos seguintes libros, que estarán encadrados en cadansúa categoría:

A praga escarlata, Jack London
Categoría «Horizontes escuros»

Nas montañas da loucura, H.P. Lovecraft
Categoría «Teño medo, mamá!»

O mundo secreto de Basilius Hoffman: O ladrón de soños,
Fernando M. Cimadevila
Categoría «Fantasías aventureiras»

O xogo de Ender, Orson Scott Card
Categoría «O distante e fantástico futuro»

Fase 2: a choiar!
Despois dunha conveniente dose de inspiración, toca sacar o mellor de cada un e escribir o noso conto fantástico.
Os relatos terán que estar escritos en lingua galega e ser orixinais e inéditos.
A extensión será de dez folios como máximo, tamaño DIN A4, por unha soa cara, a dobre espazo, xustificado e cunha fonte Garamond a tamaño 12.
Os traballos escritos en Comic Sans serán directamente descartados sen ler :P

5.Onde e como os mando?
O enderezo para envialos é o seguinte:
Urco Editora / Rúa do Avío 11, baixo / 15705, Compostela, Galiza

Debes enviar 2 sobres separados, un co relato ou relatos (non os asines!!!) e outro cos datos persoais. Este procedemento serve para que o xurado lea os contos sen saber de quen son e así garantir que os premios se repartirán só en función da calidade. Ambos os dous sobres deben ter o mesmo tamaño e levar por fóra o título do conto ou contos, a categoría ou categorías a que se adscriben e o pseudónimo co que os asines.
Sobre 1: Conterá unha folla cos datos reais da autora ou autor (nome e apelidos, centro docente e datos de contacto, título do relato ou relatos e categoría ou categorías nas que participa).
Sobre 2: Aquí terás que meter a túa obra mestra, unha ou varias, segundo participes nunha categoría ou en máis.

6.E canto teño que bulir?
O prazo de recepción de orixinais finaliza o 26 de abril de 2013.

7.Como se escollen os gañadores?
Urco Editora seleccionará, de entre todos os presentados, tres relatos por cada categoría para seren publicados nunha obra colectiva. Estes relatos serán os finalistas do concurso, de entre os cales un xurado elixirá os catro gañadores; un en cadansúa categoría.
O xurado estará formado por profesionais reputados do mundo da literatura e a cultura galegas.

8.E que gaño, se gaño?
O premio para os finalistas consistirá nun lote de libros e a publicación do seu conto nun volume colectivo. Os gañadores de cada categoría recibirán, alén do lote de libros e a publicación, un dispositivo e-reader cargado con varios títulos da editorial.

9.E cando sei se gañei?
A entrega de premios terá lugar a finais do mes de maio, en Compostela. Todos os participantes serán convidados ao acto.
A obra colectiva de gañadores e finalistas estará a disposición do público desde o mesmo día da entrega de premios.

10.A quen me dirixo se teño algunha dúbida?
Para calquera dúbida podes contactar connosco a través do correo electrónico davidcortizo@urcoeditora.com.
As dúbidas non resoltas ou calquera continxencia sobre estas bases serán resoltas pola organización e, no seu caso, polo xurado.

11.Que se vai facer cos orixinais?
Os participantes poderán pasar pola editora a recoller os seus orixinais até o 30 de Xuño, pasado ese tempo procederase á súa reciclaxe.

12.O feito de participar no concurso supón a aceptación das presentes bases.

 

Descarga aquí as bases en formato pdf

 

 

Tenda en liña!

Xa temos en marcha a nosa tenda en liña — está perfectamente integrada coa nosa web, de xeito que simplemente consultando o catálogo podes engadir a un carriño da compra os libros que desexes e pagar con PayPal ou tarxeta de crédito. Enviamosche os libros ao enderezo que nos digas cun custo baixo.

Polo de agora temos disponíbeis os tres primeiros libros da Biblioteca Lovecraft, pero en breve iremos engadindo ao carriño o resto do fondo da editorial.

Lembra, coma sempre, que temos un programa de novidades ao que te podes subscribir: recibes os nosos libros na túa casa cun 10% de desconto segundo saian do prelo, e cos gastos de envío de balde.

Se prefires as canles tradicionais, a distribuidora Pragma leva os nosos libros ás librarías de todo o país. Se na tua non os atopas, reclámallos ao libreiro!

Séchu Sende fala de «O mundo secreto de Basilius Hoffman. O ladrón de soños»

Colamos aquí unha nota do noso amigo Séchu Sende sobre a novela «O mundo secreto de Basilius Hoffman. O ladrón de soños», de Fernando Cimadevila. Obrigadísimos, Séchu:

Umhas palavras sobre O mundo secreto de Basilius Hoffman. O ladrón de soños.

por Séchu Sende a Sexta-feira, 12 de Agosto de 2011 às 12:25

Pois si. Acabo de ler O mundo secreto de Basilius Hoffman. Estou de parabéns!

Tivem sorte. Passava pola feira do livro da Corunha e um cartaz levou-me a olhada. Um desenho diferente atraeu-me á caseta dumha editorial diferente –com livros góticos, de fantasia, de ficçom científia e muito, muito terror!

Sempre tivem muito cuidado com os livros gordos. Normalmente som mais caros e, em caso de decepçom, eu som dos que sempre abandona em quanto a história se pom aborrecida. Som umha inversom arriscada. ; ) Mas o livro que chamou por mim –aínda nom sei mui bem por que- era um desses livros de mais de trescentas páginas e arredor de meio quilo.

De veras, nom estava nos meus planos ler um livro assi. Tinha a cabeça por outros mundos. Despois de ler a autobiografia de Nelson Mandela, reler um livro de poesia de Andrea Nunes, acabar um romance de José Eduardo Agualusa e ter vários livros na mesinha de noite… eu realmente fora passeiar á feira do livro ver se atopava um livro de banda desenhada…

Nom sei se me entendedes, no meu menu de leituras –porque eu som um devorador de livros- nom figurava por ningures um livro de fantasia. Nom era um ingrediente que precisara nestes momentos da minha vida, pensava, a fantasia.

Mas alí estava eu, com o livro na mao. O mundo secreto de Basilius Hoffman. O ladrón de soños.

Pensei em Candela. A minha afilhada Candela, por outro lado, tamém se foi convertendo, com o passo dos anos, noutra devoradora de livros. Aínda que, claro, quando nos juntamos para falar dessas cousas muitas vezes me avergonha a minha ignoráncia sobre as suas leituras. Eu falo-lhe de Jack London e ela, de roedores detectives.  Aventuras, aventuras, aventuras….

Pensei que se o livro nom me enchia sempre podia passar-lho a Candela, a ver se a ela lhe aproveitava… Nom sei.

Mais fantasia…, pensei com o livro na mao, mais aventuras…, pensei eu que tenho a impresiom de viver a minha própria vida como umha ventura cheia de fantasia…

Á noite, na cama, deixei de lado um livro sobre a esquizofrénia que trougera da biblioteca e colhim ar, relaxei-me e abrim o livro de Basilius Hoffman e… todo foi mui rápido. As páginas começarom a passar. A passar-se.

Lástima nom ter feito uns test de velocidade leitora antes e despois de ler o livro porque estou seguro de que aumentei as revoluçons de palavras por minuto. Havia tempo que um livro nom tirava de mim cara adiante com tanta força e tanto pracer, en muitas das suas variantes. Entre elas, o pracer da evasiom.

Devo dicer que antes de mercar o livro nom conhecia o autor, -que me botou umha sinatura no momento da compra, obrigado!- nem o desenhador nem ninguém da editorial. Polo tanto estou a falar da minha experiéncia leitora com umha única vontade: animar a outra gente a que poida viver umha aventura parecida á que vivim eu com este livro nas maos.

Nom tenho pensado dizer-vos nada sobre a história. Nem sequera vou fazer umha crítica sobre este romance de fantasia. Nom tal. Porque nom quero participar no vosso proceso criativo, nom quero condicionar a vossa criatividade quando comecedes a passar as páginas. Aínda que, sem querer, talvez já o esteja a fazer…

Houvo cousas das que nom gostei. Botei de menos, por exemplo, um maior protagonismo das mulheres. Mas aquelas das que gostei forom as que me pugerom a escrever estas palavras antes de saír para o supermercado animando-vos a abrir “O ladrón de soños”.

Porque neste mundo cruel, nesta sociedade violenta que nos tocou viver, entre a porca miséria que nos rodeia, com este livro nas maos tamém aprendemos -entre outras cousas- a proteger os nossos sonhos. E as nossas realidades.

Parabéns ao escritor, Fernando Cimadevila, e ao ilustrador, Iván Valladares. E parabéns, por suposto, a mim mesmo. Por ter-me adentrado num mundo de fantasia made in gz e ter vivido esta experiéncia fantástica.

Ah!!!!, e, isso si, tenho claro que em quanto passe por umha livraria merco outro exemplar de “Basilius Hoffman” para a minha afilhada, Candela.

Presentación da Biblioteca Lovecraft

Como xa sabedes, recentemente publicamos o primeiro volume da obra completa de H.P. Lovecraft, o autor de Providence creador dun xénero de ciencia ficción cósmica e materialista que tivo innúmeros seguidores.

O vindeiro 29 de Xullo ás 22:00, en colaboración coa Sociedade Lovecraft da Galiza, presentaremos no Centro Social O Pichel os volumes 2 e 3 da Biblioteca, que conterán as historias «O Horror de Dunwich», «O que marmura na escuridade» e «Nas montañas da loucura», referentes na construcción dos Mitos de Cthulhu.

A presentación será enmarcada nas celebracións do 75 aniversario da Sociedade Lovecraft da Galiza, que organizará ese dia e nese mesmo lugar unha partida de rol en vivo ambientada no universo lovecraftiano que, agardamos, permitirá aos asistentes participar das mesmas terroríficas emocións que os protagonistas das historias do solitario de Providence. Podedes atopar mais información sobre a partida de rol na propia web da SLG, e tamén nun evento de Facebook creado ao efecto.

A presentación e a partida de rol serán amenizadas con música inspirada nos Mitos, petiscos e, por suposto, estraños e impios eventos mais alo do comprensível para a mente humana.


Actualización da subscrición no noso blogue

Para facilitarvos o proceso de subscrición á nosa editorial, neste blogue introducimos un novo formulario co que vos será moito máis fácil levar a cabo este pequeno trámite que é unha grande axuda para nós e o noso proxecto. Toda a información que nos proporcionedes a través do mesmo será tratada coa debida precaución, ao conter información privada, mais se de todos os xeitos preferidos subscribirvos a través doutra vía, podedes empregar calquera das vías de contacto que temos á vosa disposición.

Lembrade que así teredes un desconto do 10% e, ademais, recibiredes de balde os libros no voso domicilio.

Un saúdo!

O mundo secreto de Basilius Hoffman

Seguindo coa nosa Colección Alcaián, o 12 de maio imos presentar o novo título de Urco Editora, O mundo secreto de Basilius Hoffman. O ladrón de soños. Os seus autores, Fernando Cimadevila e Ivan Valladares, apostan porque este sexa o primeiro dunha serie de volumes que narren as aventuras do profesor Basilius Hoffman, historiador e arqueólogo que se embarcará nunha viaxe fantástica na procura do Diario do Cartógrafo. Nesta obra as aventuras están garantidas.

O seguinte 12 de maio terá lugar a presentación no Centro Sociocultural e Xuvenil O Ensanche (Frei Rosendo Salvado 14-16) ás 20 hrs., en Compostela, como se pode ver na páxina da saga que xa está en funcionamento. Esperamos vervos a todos por alí, logo.